ರಾಮಧ್ಯಾನ

ಕವಿತೆ: ರಾಮಧ್ಯಾನ
ರಚನೆ: ಕೃಷ್ಣಪ್ರಕಾಶ ಬೊಳುಂಬು

ನೆನೆವುದು ಮೊದಲಿಗೆ ಸಿರಿರಾಮನನು,

ಕೂಡೆಯೆ ನೆನೆವುದು ಸೀತೆಯನು,

ನೆನೆವುದು ಕೂಡೆಯೆ ಹನುಮಂತನನು,

ಕೂಡೆಯೆ ಲಕ್ಷ್ಮಣ ಭರತ ಶತ್ರುಘ್ನರನು ||ಪ||

ಮಾಯೆಯೊಳಡಗಿದ, ಮಾಯೆಯ ಮೀರಿದ,

ಚಿಂತನೆಯನ್ನು ಮೀರಿದ ರೂಪವನು, ||ಅ.ಪ||

ಎದೆಯೊಳು ಶೋಭಿಪ ಸಿರಿವತ್ಸಾಂಕಿತ,

ಎಡಗೈಯೊಳು ರಾಜಿಪ ಕೋದಂಡ,

ಬಲ ಭುಜದೊಳು ಬಲುಬತ್ತಳಿಕೆಯನಾಂತು,

ನೆರೆದಂಬಿನಿಂ ತೊಳಗುವ ಮೂರ್ತಿಯನು ||೧||

ಲೋಕ ಸಮಸ್ತಕೆ ಆಸರೆಯೀವ,

ಒಳಗಣ ಆಸರ ನೀಗುವ ಅಡಿಗಳನು||೨||

ಇರುವಿಕೆಯನ್ನಿರಮಾಡುತ ಕಳೆಯುತ,

ಒರ್ಮೆಯನ್ನಿರಗೊಟ್ಟ ಅಡಿಗಳನು||೩||

ನಂಬಿದ ಭಕ್ತರ್ಗೆ ಅಭಯವನ್ನೀಯುತ,

ನಲವನ್ನಿರಗೊಟ್ಟ ಅಡಿಗಳನು ||೪||

ಒಳಗಣ ಆಸರು = ಆತ್ಮದ ದಾಹ, 

ಆಸರು = ದಾಹ, ಬಾಯಾರಿಕೆ 

ನಲವು = ಆತ್ಯಂತಿಕ ಆನಂದ 

ಇರುವಿಕೆಯನಿರಮಾಡುತ ಕಳೆಯುತ = ಸೃಷ್ಟಿ, ಸ್ಥಿತಿ  ಮತ್ತು ಲಯಗಳನ್ನು ಇರಮಾಡುತ್ತ, ಇರುವಂತೆ ಮಾಡುತ್ತ

ಒರ್ಮೆ = ಏಕತ್ವ, ಏಕಮೇವ ಅದ್ವಿತೀಯ 

ಸಿರಿವತ್ಸಾಂಕಿತ = ಶ್ರೀವತ್ಸ,

ನೆರೆದಂಬಿನಿಂ = ಬಾಣಗಳಿಂದ ತುಂಬಿಕೊಂಡ

ತೊಳಗುವ = ಹೊಳೆಯುವ